Sɛ́t ŋkə : exercice de traduction : Traduit en francais et en anglais le texte écrit en langue Yemba / Translate the text written in Yemba into French and English.

 

Me fá' ŋkap-aa mela'akɔ ɔ?

 

 Tɛ me gɔ́ gɛ́ ŋiŋ eyi wɛ́ ŋkap mbɔ a eɛgɔ mbuu nzwíkɛ zi-ii metsiak nzho áɛ ŋgáŋ ŋkap ei ?

A eɛ ŋgáŋ ŋkap mbíŋ ŋgɔ̄ á mba yi a te ŋkú'ɔ yi le pfɛ́t azo-ɔ , ápíŋ ŋgɔ̄ mbɔ a ea le gʉ́ɔ  ántə ntshi á ŋgi te mbɔ́ ezi ŋgya.

Me eɛsi ŋgɛ́ a wɛ́ ŋkap tembɔ a kʉŋ nzíŋ á esi tɛ ŋkwa metseŋ melaŋ mi shhʉ́ te mī. A eɛgɔ mbuu ŋgʉ́ɔ nnáŋ zi-ii ántə ntsentsɛ te núu bia , á ánɛ ntii baa ezi epuɔ nú bia ewu mbʉ́'ɛ nnɛt ntsɛ́ á lezeŋ ewu.

Me eɛsi ŋgɛ o wɛ́ ŋkap , ŋiŋ ánɔ pɛa epɔmemia pu píŋ ŋgɔ̄ efʉ' ezi a eɛsi njú'ɔ tepɔŋ ŋgɔyi o gɔ́-le ju' wu le lɔk yi ŋgʉ́ɔ á dɔkta-a.

'ɔ́ɔ́ɔ́, yégéééy, eju ŋkap mɛt eɛsi ndɛ ndɔk ŋgɔ̄-ɔɔ le ŋghʉ́ akezo o? shúŋɔ ga lɔ!

nɔŋgɛ azɛ ncʉ' emɔ' ntii lewɛ́ ŋkap , ncʉ'pup ŋiŋ gɔ̄ mbuŋ, ntii mbuŋ eyi ántə epuŋ yi ŋke mbíŋ nzwík nzho mbɔ́ŋ, njwákne efuɔk mbɔ́ŋ ánɛ ntii ajʉ' ezi me te nú bia te mmák mbʉ́'ɛ nnɛt ntshɛ́ á lezeŋ ajʉ' mɛt-ɛ.

ánɛ ŋgáŋ ŋkap eyi a te lɔk ŋkap zi nzó azo mbɔ́ŋ mpfɛ́t-ɛ pɔ́ mbuŋ eyi a eɛ ántə epuŋ yi ŋke ŋgɔ̄ mbɔ a eɛgɔ mpfɛ́tɛ azo mbɔ́ŋ awɔ tsíɛ awɔ ɔ?

ánɔ ŋgáŋ ŋkap eyi a eɛgɔ mbu nzíŋɛ zi-ii á esi pɔ́ mbuŋ eyi a wɛ́ kwaŋ awɔ tsíɛ awɔ ɔ?

Mepuŋ eɛ á apɛ njú'ɔ mbɔ́ŋɔ, epuɔ epi me píŋ ŋgɔ̄ ewu ŋgɛ́ pɔ́ eɛ megáŋ ŋkap pɔ́ féŋ ŋkap zɔp, mbíŋ njʉ́ɔ ŋgʉ́ɔ'.

Me zi ŋgwa'a nfhoɔnɛ akɔ te ŋgɛ́ ŋiŋ wɛ́ ŋkap ei? ndi te pup-ɔ mbɔ lewɛ́ ŋkap eɛsi ndɔkɔ ŋgɔ̄ɔ-ɔɔ lewɛ́ elaa a? o wɛ́ nflaŋkhʉ̄ ŋgwɛ́-ɛɛ ŋkap, ŋgwɛ́ tɔ́si ŋgwɛ́-ɛɛ ŋkap, ŋgwɛ́ ncu'ŋkaa ŋgwɛ́-ɛɛ ŋkap.

áfhoɔnɛ ŋkwa menu emi mpɛ ea lʉ́ eya'a, mbɔɔ anɛ pa' ta' nzwiŋ eɛ te wu eyi me lɔk nfho pup te ŋgɛ́ ŋiŋ eɛ ŋgáŋ ŋkap-a, tɛ me gɔ́-le ge zoko ŋgɛ lewɛ́ ŋkap eɛ si ŋgɔ̄ -ɔɔ ndeŋte lejú' mbɔ́ŋɔ pɔ́ ŋkap ezi me wɛ́ lɛ?

 

ŋgáŋ ŋkap eyi náŋ tepɔ́ŋ ágɔɔ mbuŋ eyi a kú'te ŋkap pɔ́ mezo lewu' tenzane ántə mbu yi.