Mega sesə pɔ́ tuaklɔp
lega sesə
Sesə ea le gʉ́ɔ á mba' ntii njúŋ apuɔ, ŋkó ewu, ewɔ zíŋ azoko zā'
asaŋa zi. Mɛmba' ea kɔ̄' me mba tee asaŋa, njʉ́ɔ mvu' mesesə wɛ́ mesaŋa tɛ lɛ
nzɛ-ɛɛ yi. A gáa meŋ nshúŋ wɛ ɛ? a zí le tɔ́kte ndé ambu mvu' mesesə ŋgɛ
asaŋa wa'a ndi te pɔ́ŋ, ŋgɛ tembɔɔ awʉɛ wʉɛ
lɛ zā' azi asaŋa ndɔk ncʉ' pa' yi la. Tɛ emɔ' mesesə emi pɔ tsáne-ei,
mbíŋ mbu te leghi wɛ́ gɔ̄wu njú’ɔ nchu yi.
Ndem ea le pɔ́ awʉɛ wʉɛ ŋgyíɛ yi ŋkwa metso emi eɛsi nzɛ́tɛ, tɛta' ŋiŋ aé ke fu mbék a cʉ'ɛ
nfá'-aa ŋgɛ ŋkwa ala' la' ncʉ' pa' yi la lɛ ?
lega tuaklɔp
Tuaklɔp eɛgɔ mbuu ntóɔ áŋkwameli'i ŋgʉ́ɔɔ nfá'a ŋkap, mba'lekʉɔ, a le
pu nfá' zi ŋkap fá' ééé, nda' te wɛ́,
ápíŋ ŋgɔ̄ eya'a pa'a, ndɛ ŋgɔ̄ efʉ'zi me eɛsi nshúŋnɛ menu te ntɔ́ŋ ŋkap ewu
álezeŋ yi, tuaklɔp lé ŋgɛ ''ŋkap akɔ ɔ?'' , ''ŋkap eɛ azo tepɔ́ŋ'', ''megáŋ
ŋkap gɔ̄-ɔɔɔ metsɔŋ te mmí'', '' pɔ eɛ mesɛta, pɔ sāŋ metshi te ndɔk ŋgwɛ́
ŋkap''
yégéééy, ŋkap akɔ lɛ ɛ?, tɛ o eɛsi ŋgɔ̄ɔ áŋkwameli'i ntóɔ ŋgʉ́ɔ
nfá'a ŋkap-aa mela'akɔ ɔ?
O gɛ́ ŋkap eɛ azo tepɔ́ŋ, o eɛ wúɔ eyi o náŋ á nu á taŋazoko nfá'a
ŋkap la. o fá'a azo tepɔ́ŋ mela'akɔ ɔ? o eɛwu ŋkɔ̄ŋɔ wu le cʉ' ŋiŋ tepɔŋ lɛ ?
o eɛsi ndéɛ azo pɔ́ nchu wu, meŋghʉnu
mu píŋɛ ndʉ́'nɛ azo mɛt. Áɛ gaalɛ mbɔ eie gɔ̄-ɔɔ leghi etsi o eɛsi ŋghʉ́ɛ,
o fá'a wu le láte membu'.
Tuaklɔp a lé azo tɛ me jú' nchu yi a gʉ́ɔ ŋghʉ́ azi nzem ntem. Tuaklɔp
a eɛgɔ te ndíi á ŋgya-a, á pu ŋge gɔ̄ menū metaa á ndaajhʉ mbɔ a nda' ntó
ŋgʉ́ɔ nfá' ŋkap. Nu le tɔ́ tuaklɔp tɛ a seŋ te ntɔ́k nzeem mbuɔŋwa, a gɔ̄ yi
le zóko á nu á taŋazoko nfá'a ŋkap. A fá' ŋkap tɛ tʉɔp tshi a te zi ŋgwɛ́
njhʉ yi lelɔk nnáŋ á esi njhʉ́ tʉɔp-ɔ. Áɛ ali'i nzhɛ emɔ' epuɔ ge zók á
mba pɔ́ epɔmemia pɔp zwíite, tuaklɔp gɔ̄ á apɛ nfá'a ŋkap. á eseŋnjhʉ epuɔ
kɔ́' me mba pɔp nzwíite tɛ cʉ' yi, a te zhɛ́ azo ezi me gɛ́ nzwíite-ɛ, a
teene letó nnáŋ yi le kɔ̄'. Ntə tso' la' nzɛte kú' a le afa' kɔ̄'. a ge kɔ̄'
afa' mbɔ ŋkwa epuɔ ea nnda' ndí tembɔɔ nzwi yi. eyi menzwi pɔ́ ŋgáŋ ŋkɔ'ɔ mba
me eɛgɔ nzókɔ; a gɔ̄ á apɛ nfá'a ŋkap.
ŋkwa meŋgʉɔ' muɔ mɛt emi tuaklɔp eɛsi njʉ́ɔ mela' ŋkap la, o ke mbíŋ nzɛ́te
yi anu ánɛ ŋkap a shúŋɔ wu ŋgɛ ŋkap eɛ azo tepɔ́ŋ. A eɛgɔ nzóko ŋgɔ̄ɔ ánɛ
etsi lenaŋa ŋkʉ́nɛ-ɛɛ ánzem ŋkap, ŋke mbíŋɛ te ŋgwíɛ-ɛ. A wɛ́ menzwi pɔ́ ewɔŋkhʉ
pa' a te wɛ́ la, a eɛgɔ ŋke te njʉ́ɔɔ wɔp-ɔ, a gɔ̄ yi le kʉ́ne ánzem ŋkap.
Me eɛgɔ te ncʉ́' azo ezi me pā-a. O gɔ́-le nɔŋɔ mbāa ŋkap pɔ́ megáŋ
ŋkap mbíŋ nda' ŋge zoko ncʉ́' ju ŋgáŋ ŋkap-a. Tuaklɔp aé la' zóko fá'a zi
ŋkap fá' píŋ ke le wɛ́. Tɛ a nɔŋɔ ŋgwíɛ nda' yi a kúmne atswhi zi ánɛ le
pā megáŋ ŋkap.
